يا ترى فكرتى قبل كده إن الأكل ممكن يبقى له تأثير كبير على تركيز أطفالك؟ كتير من الأهالي بتنسى إن التغذية الصح هي الأساس في تحسين أداء العقل وزيادة تركيز الأطفال. في المقال ده، هنساعدك تعرفى شوية من الأطعمة اللي بتقوي التركيز، واللي تخلي أطفالك أذكى وأكثر نشاط.

الأكل المفيد للدماغ

أول حاجة لازم تعرفى إن المخ بيحب الأكل الصحي. يعني مش أي حاجة تأكليها لطفلك هتساعده يركز. في حاجات لازم تكون جزء أساسي في يومه:

• المكسرات والبذور: اللوز، الجوز، وبذور الكتان.. الحاجات دي مش بس لذيذة، لكن كمان مليانة أوميجا 3 اللي بتغذي العقل. لما طفلك يأكلها، تركيزه هيزيد بشكل ملحوظ، ممكن تضيفهم مع أكلات صحية تانية بيحبها زى الزبادى، أو إضافتها للكيك أو البسكويت لو بتحضري كيك أو كوكيز في البيت، ممكن تضيفي قطع صغيرة من المكسرات. أما البذور فيمكنك تقديمها على السلطات لو أطفالك بيحبوا السلطة، أوإضافتها للعصائر أثناء تحضير العصائر الطبيعية زي الموز بالحليب أو الفراولة، ضيفي شوية بذور شيا وانقعيها شوية قبل الخلط.
• الأسماك الدهنية: السالمون والتونة ودول مش منتشرين فى مصر والبديل المنتشر أسماك الماكريل و أسماك السردين . دول يعتبروا كنز لأنهم مليانين دهون صحية. المخ بيعشقهم لإنهم بيزودوا كفاءة عمل الخلايا العصبية. دراسات وأدلة كتير اتعملت و أثبتت إن أحماض الأوميغا 3 الدهنية ضرورية لنمو الدماغ وتطوره لدى الأطفال. الاوميجا بتلعب3 دور مهم في بناء أغشية الخلايا العصبية وتعزيز الاتصالا بين الخلايا، مما يساهم في تحسين الوظائف الإدراكية والتعلم والذاكرة. تقليل أعراض ADHD تشير بعض الدراسات إلى أن أوميغا 3 قد تساعد في تقليل أعراض اضطراب فرط الحركة ونقص الانتباه لدى الأطفال.
• الخضروات الورقية: السبانخ والبروكلي مثلًا. دول مليانين فيتامينات ومضادات أكسدة بتحمي خلايا المخ وبتحفز التركيز. ممكن تقدمى للاطفال في الساندويتشات السبانخ أو الخس جوه الساندويتش مع الحاجات اللي بيحبوها زي الجبن أو الفراخ المشوية. او ممكن خلطها في العصائر. اعملي عصير صحي زي الموز مع السبانخ وحطي شوية عسل للتحلية. بيتزا الخضروات ضيفي أوراق الجرجير أو السبانخ المفرومة فوق البيتزا، لما تدخل الفرن بتاخد طعم مميز ومش بتبقى واضحة.

مشروبات بتنشط العقل

وكمان فيه مشروبات مهمة لزيادة تركيز طفلك. مشروبات بسيطة ممكن تعمل فرق كبير

• عصير البرتقال الطبيعي: مليان فيتامين سي اللي بيزود النشاط العقلي. خلي طفلك يبدأ يومه بكوباية عصير طازة.
• الحليب: الكالسيوم مش بس للعظام، ده كمان بيساعد على تقوية الذاكرة. الحليب أو الزبادي حاجة لازم تكون موجودة في كل يوم.
• الماء: لو طفلك مش بيشرب كفاية مياه، تركيزه هيقل بسرعة. خلايا المخ محتاجة ترطيب مستمر عشان تشتغل بأفضل شكل.

حاجات لازم نبعد عنها

في أكلات بتقلل من تركيز الأطفال بدل ما تزوده. حاول تبعد عنها قد ما تقدر:

• السكريات الكتير زي الحلويات والشوكولاتة الجاهزة. دي بتدي طاقة وقتية بس بعد كده بتسبب خمول.
• الوجبات السريعة والمقلية. الدهون الغير صحية بتأثر على أداء المخ وبتخلي الطفل يحس بتعب وكسل.
• المشروبات الغازية. مليانة كافيين وسكريات مضرة، وبتسبب تشتت للأطفال.

خلي دايمًا الأكل الصحي قريب من طفلك. ساندويتش زبدة فول سوداني بدل الشوكولاتة، شوية خضار مقطّعين بدل الشيبس. الحاجات البسيطة دي بتصنع فرق رهيب. وكمان خلي الوجبات الرئيسية متوازنة بين البروتينات والكربوهيدرات والخضار.تذكر، المخ محتاج رعاية زي ما الجسم محتاج رياضة. الأكل الصحي هو المفتاح لتركيز أفضل ومستقبل أذكى لأولادك. جرب الحاجات دي، وشوف الفرق بنفسك!