الصيام عبادة عظيمة، لكنه في نفس الوقت يخلّي بعض الناس يحسّوا بالخمول والكسل، وده بيرجع لأسباب كتير. ناس تقول إنه بسبب قلة الأكل والشرب، وناس تانية ترجّح إنه نتيجة لتغيير نظام الحياة فجأة. لكن لو بصّينا للموضوع من ناحية علمية، هنلاقي إن السبب الحقيقي بيرجع لعوامل زي اضطراب الساعة البيولوجية، نقص الجلوكوز، وجفاف الجسم. فإزاي ممكن نواجه المشكلة دي ونحافظ على نشاطنا طول اليوم؟

ليه بتحس بالخمول أثناء الصيام؟

انخفاض مستوى الجلوكوز في الدم

الجسم بيعتمد على الجلوكوز كمصدر أساسي للطاقة. لما بتفطر بالليل وتمر ساعات طويلة من غير أكل، مستوى السكر في الدم بيبدأ يقل تدريجياً. والنتيجة؟ إحساس عام بالتعب، ضعف في التركيز، وكأن جسمك مش قادر يتحرك

الجفاف وتأثيره على الطاقة

قلة شرب المياه قد تكون السبب الأساسى للصداع، قلة شرب المياه بتسبب الجفاف وده بيخليك تحس بالصداع أثناء رمضان، مع نقص شرب الكافيين طول فترة الصيام. الجفاف بيأثر على تدفق الدم ووصول الأكسجين للخلايا، وده بيؤدي إلى الإحساس بالإرهاق وضعف التركيز. المياه مش بس عشان تروي عطشك، لكنها أساسية لكل العمليات الحيوية في الجسم. مع قلة شرب الماء أثناء الصيام، بيبدأ الجسم يفقد سوائل، و فقدان الأملاح المعدنية زي البوتاسيوم والمغنيسيوم وده بيساهم في زيادة الشعور بالخمول والتعب العضلي، وبيأثر على ضغط الدم، وتوصيل الأكسجين للخلايا وبيخليك تحس بكسل وخمول واضح.

قلة النوم واضطراب الساعة البيولوجية

لما الجدول اليومي يتغيّر فجأة، ويبدأ السهر يزيد عشان التراويح والسحور، الجسم بيتلخبط! الساعة البيولوجية بتتأثر، ومستوى هرمون الكورتيزول، اللي بيحافظ على نشاطك، بيتغيّر. فتلاقي نفسك بتحس بإرهاق حتى لو نمت ساعات كافية.

الأكل غير المتوازن وقت السحور والفطور

لو كل وجباتك مليانة سكريات ونشويات بسيطة، هيحصل ارتفاع مفاجئ في السكر بعد الفطار، وبعدها هيهبط بسرعة. والنتيجة؟ إحساس بالخمول بعد فترة قصيرة جداً. نفس الموضوع لو أكلت وجبات تقيلة جداً في السحور، الجسم هيستهلك طاقة كبيرة للهضم، وهتحس إنك مش قادر تتحرك.

قلة الحركة تزيد الإحساس بالكسل

ناس كتير لما تحس بتعب أثناء الصيام، يقرروا يقعدوا من غير حركة طول اليوم. لكن العكس هو الصحيح! قلة النشاط بتخلي الدورة الدموية أبطأ، وتخلي الجسم يحس إنه مرهق الصيام مش معناه إنك تفضل جالس بدون أي نشاط لأن قلة الحركة بتضعف الدورة الدموية وبتقلل من وصول الأكسجين والمواد المغذية للعضلات والمخ، وده بيؤدي إلى الإحساس بالخمول أكتر. الحركة البسيطة ممكن تحسن مستوى النشاط العام.

انخفاض معدل التمثيل الغذائي

مع الصيام، بيحاول الجسم التكيّف مع قلة السعرات الحرارية اللي بيدخلها، وده بيؤدي إلى تقليل معدل الأيض للحفاظ على الطاقة. بعض الناس بيلاحظوا إنهم بيشعروا بالكسل لأن الجسم بيبطئ استهلاك الطاقة كمحاولة للحفاظ عليها لأطول فترة ممكنة.

إزاي تتغلب على الشعور بالكسل في رمضان؟

اختيار وجبات متوازنة لتجنب الخمول

الأكل الصح بيفرق جداً في مستوى طاقتك طول اليوم. حاول تركز على:

• البروتينات: زي البيض، الفول، الزبادي، والمكسرات. دي حاجات بتمد الجسم بطاقة لفترة طويلة بدون تقلبات في مستوى السكر.
• الكربوهيدرات المعقدة: الشوفان، الأرز البني، البطاطا الحلوة، لأنهم بيطلقوا الطاقة بشكل تدريجي.
• الدهون الصحية: زيت الزيتون، الأفوكادو، اللوز، والفستق بيساعدوا على تحسين الأداء العقلي والجسدي.

شرب كميات كافية من الماء

نقص المياه من أكتر الحاجات اللي بتسبب التعب والكسل في رمضان. الحل؟ لازم توزع شرب المياه بين الفطار والسحور. وتقلل من المشروبات اللي فيها كافيين لأنها بتسبب فقدان السوائل أكتر، زي القهوة والشاي.

تنظيم النوم لتحسين الطاقة

عشان تحافظ على نشاطك طول اليوم، محتاج تنظم نومك. النوم العميق والمستمر بيساعد الجسم على استعادة طاقته. جرّب إنك تنام ساعات متواصلة، حتى لو كان في وقتين مختلفين، زي قيلولة بعد الظهر مع نوم جيد بالليل. وتجنب الشاشات قبل النوم، لأن الضوء الأزرق اللي بيطلع منها بيقلل من إنتاج الميلاتونين، وهو الهرمون المسؤول عن النوم.

الحركة والنشاط مهمين لمكافحة الخمول

حتى لو حسّيت بتعب، حاول تتحرك شوية. المشي بعد الفطار أو حتى عمل بعض التمارين الخفيفة من ٢٠-٣٠ دقيقة بيحسّن الدورة الدموية وبيدى الجسم إحساس بالطاقة، ولكن تجنب النشاط البدنى العنيف لأنه قد يؤدى لفقد السوائل والطاقة. الحركة .بتساعد على تنشيط الأيض، وده بيقلل من الإحساس بالخمول

.

تقليل التوتر والإجهاد النفسي

التوتر بيساهم بشكل كبير في الإحساس بالإرهاق. لما تكون قلقان أو مضغوط، الجسم بيفرز هرمون الكورتيزول بكميات كبيرة، وده بيأثر على مستويات الطاقة. عشان تتغلب على ده، جرّب تمارين التأمل، أو التنفس العميق، أو حتى ممارسة أنشطة هادئة زي القراءة والاستماع للموسيقى المريحة. الأشخاص اللي بيعانوا من القلق والتوتر خلال الصيام بيحسّوا بالخمول بشكل أكبر مقارنةً باللي بيحافظوا على هدوئهم النفسي.

وفى النهاية، التغلب على الشعور بالكسل في رمضان مش مستحيل، لكن محتاج شوية تخطيط ذكي. الأكل الصحي، شرب المياه بكفاية، النوم المنتظم، والنشاط البدني البسيط، كلهم عناصر بتساعدك تحافظ على نشاطك وتستمتع بالصيام بدون الإحساس بالخمول. لو عدّلت عاداتك الغذائية والروتينية، هتلاحظ فرق كبير في طاقتك وأدائك خلال الشهر الكريم.